Histoire de Montdidier
Livre I - Pièce justificative 4
par Victor de Beauvillé

In nomine sancte et individue Trinitatis. Ego Radulphus Viromandorum comes notum facio cunctis fidelibus tam futuris quam præsentibus quod Compendiensis ecclesia quemdam locum Bekegnies vocitatum, omnino desolatum et incultum possidebat, in quo cum villam construere vellet et propter malitiam circum manentium per se hoc adimplere nequiret, quemdam suum amicum et fidelem nostrum Albericum scilicet de Roia, qui suis sumptibus villam ædificavit, et habitatores conduxit tali pacto in possessionem præfati loci associavit, ut in omnibus quæ infra corpus et firmitatem villæ fuerint, ipse Albericus medietatem habeat, et ecclesia alteram obtineat. Est præterea in eadem villa pars quædam terræ, quam idem Albericus comparavit, in qua ecclesiam associavit, redita sibi medietate pecuniæ qua eam comparavit. Molendinum etiam ejusdem loci cum pene destructum esset, et ecclesia illud, propter quorumdam pravitatem, qui hæreditatem in eo clamabant restaurare nequivisset ; tali conditione jam dictum Albericum in possessionem molendini associavit ut idem Albericus suo sumptu, stagnum, calcedoniam et molendinum extruerat, et medietatem in eis haberet. Sicut autem molendinum, stagnum et piscationem in commune debent tenere, sic de communi fructu, cum necesse fuerit, molendinum, vivarium atque calcedoniam in commune debent reparare, ut ipse vel hæres ejus contra omnes qui calumniam in molendino vel vivario fecerint, sive malum fratribus ecclesiæ, vel custodibus molendini, aut piscatoribus intulerint ; ecclesiam manutenebit et garantissam fideliter portabit. Piscatores quoque qui per præceptum ecclesiæ in eodem stagno piscaturi sunt, quoties ab ecclesia vocati fuerint, liberum ingressum et egressum, nec non transitum per aquas prædicti Alberici et hæredis ejus habebunt, et si alius eis in eodem itinere malum fecerit, ipse per omnia potissimum adjutor erit, et eos omnino defendet et liberabit. Quod si erga molendinarium hæreditatem in molendino clamantem, vel etiam erga illos qui se faciunt hæredes ejusdem villæ vel molendini, vel alicujus possessionis ad eamdem villam pertinentis, compositione Albericus vel hæres ejus medietatem dabit. In eadem autem villa extra partem, sunt antiqua jura ecclesiæ, videlicet mansio una, decimæ, terragia, quæ omnia libere et absolute absque participatione alterius possidet ecclesia. Cum vero necesse fuerit ut minister in villa ponatur, vel custos in molendino, pari consilio, ecclesiæ videlicet et Alberici vel hæredis constituetur. Si vero jam dictus Albericus vel hæres ejus aliquid in augmentum præfatæ villæ acquisiverit, reddita sibi ab ecclesia sumptus medietate prænominata pactione sibi eam associabit. Et tam in pescatione vel avibus, quam cæteris prænominatis rebus, ecclesiam medietatem sine contradictione habebit. Ne vero pactio in posterum aliquo modo violetur, præsentem paginam testium annotatione muniri et sigilli nostri impressione roborari decrevimus prædictæ pactionis testem et obsidem personam nostram fecimus. Testes de monachis : Ansoldus abbas Compendiensis, Robertus prior, Gilbertus, sacerdos, etc. ; de canonicis. Haymo de foco. Haymo junior. Thomas de Ponti. Lisiardus. De militibus : Wermundus, frater Alberici. Rogonus filius Alberici. Ego Roscelinus canonicus Compendiensis et capellanus comitis Radulphi relegi. Actum anno dominicæ incarnationis. M.C.L.XIII.