Blason santerre.baillet.org

Histoire de Montdidier
Livre I - Pièce justificative 21

par Victor de Beauvillé

Pièce justificative 21

Ce sont les aliez de Vermandoys, de Biauvoisis, Darthoys, de Ponthiu, et de Courbie contre le roy.

1314.

 

A tous chiaus qui ches presentes lettres verront ou orront li noble et li communs des pays de Vermendois de Biauvoisis Dartois de Pontiu et de la terre de Corbye pour nous nos aliez et adioing aveukes nous estanz de denz les poins et les metes du royaume de France Salut sachent tout que comme tres excellens et tres poissanz prinches nostres tres chiers et redoutés sires Philippes par la grace de Dieu rois de France ait fait et leve plusieurs tailles subvencions exactions non dehues changemens de monoyes et plusieurs autres choses qui ont este faites de volenté pourquoi li noble et li communs du royaume ont este mout grévés appouri et a mout grant meskief pour les choses dessus dites et encor sont et n'appert pas que il soit tourne en loneur ne ce pourfit du roy ne du roiame ne en la deffension du proufit commun des ques griés nous avons plusieurs fois requis et supplie humlement et devotement ledit notre seigneur le roy que chez choses vausist deffaire et delaissier et riens n'en a fait et encore en cheste anée presente courant par lan mil CCC et quatorre li dis notre sires li rois a fait imposicions non dehuement seur les nobles et sus le commun du roiame et subvencions les ques il sest efforchies de lever dichans la quele chose nous ne poons souffrir ne soustenir en boine conscience car ainsi perdrions nous nos honours et nos franchises et nos libertés et sereimes en servitude a tous jours et nous et chil qui après nous venront et seur toutes ches choses dessus dites nous avons requis au dessus dit notre seigneur le roy et a sen consaill que drois nous en fust fais seur lesquels choses il nous fu respondu que li rois estoit bien en fourmez que chestoit ses drois et que autre drois on ne nous en feroit et que li rois estoit assez poissanz de contraindre et de punir les rebelles seur ches choses et depuis mustré de fait et par manache que les choses dessus dites il volait avoir de volenté et par forche et non mie par droit pour les queles choses dessus dites nous li noble de Vermendois de Biauvoisis Dartois de Pontiu et de la terre de Corbye dessus dis pour nous et pour nos adioins et alyes et en le manière que dessus est dit avons juré et promis par nos sairemens loyaument et en boine foy pour nous et pour nos hoirs as nobles et as kemuns de Champaigne et de Bourgoigne et des contés Dauchoire et de Tournoirre a et leur adioins et aliez estans de denz les poins et les metes du roiame de France que nous en la subvention de cheste presente anée et en tous autres gries et noveletés non dehuement faiz ou a faire en tans present ou a venir que li rois notre sires ou autres leur vaudroit faire leur aiderons et secourrons a nos propres cous et dépens selont la quantité et l'estat que la besoigne requerroit et laide dessus dite li secours la quandité et la maniere sera regardée et ordonée par douze chevaliers des nostres tels comme nou eslirons et par douze chevaliers des leur tens comme ils nous vaurront eslire par les quelz douze laide et li secours sera mandés et faiz suffisamment et avons nous encore promis et juré pour nous et pour nos aljez et adioinz si comme dessus est dit et pour nos hoirs et successeurs que nous ou aucuns de nous ne se desjoindra ne departira de chest ordenanche ne ne fera acort sans lassentement des autres toutes les choses dessus dites avons nous juré et promis à tenir et warder bien et fermement à touz jours mais et par nos sairemens par nos hoirs as dessus dit nobles et commun de Champaigne de Bourgoigne et des contés Dauchoirre et de Tournoirre et a touz leur adioint et aliez et a leur hoirs si comme dessus est dit et volons que chez convenanches et allianches soyent tenues perpetuellement et a touzjours et est a savoir que en cheste chose faisant nous avons retenu et retenons volu et volens que les obeissanches franches loiautés et hommages jurés et tontes autres droiture que nous devons au roi de Franche notre Seigneur et a leurs successeurs soient wardées sauvées et réservées pour aus les queles nous n'entendons volons ne ne pensons de rien enfraindre ne aller encontre ou temps present ne avenir et pour che que che soit ferme cose et estaule pour nous et pour nos adjoinz et alyez a le prière et a le requeste des nobles et du commun de nos pays dessus dis le chevalier chi après nommé ont chez presentes letres scelées de leurs seaus chest a savoir : li sires de Roye, li sires de Gavecourt, le syres de Hangest, li sires de Vrenin, le sires de Moroill, mesire Raouls de Maignelier, mesire Symon du Sart, mesire Wistaces de Ronkeroles, mesire Jehans de la Boissière, li boirgnes de Dargies, li sires de Fieules, li sires de Renty, li sires de Loncvilers, li sires de Willervall, li sires de Sowastre, bidens de saint Martin, li sires de Mangoval, mesire Gille de Nevile, li sires de Liskes, li sires de Sapignyes, li vidames Damiens sires de Pinkegny, li sires de Bouberch, li sires de Brimeu, li sires de Caumont, mesire Gerars de Pinkegny, mesire Ansel de Cayeu, li sires de Biauval, mesire Gerars Kieres, mesire Ferris de Pinkegny, li sires de Hailly, li sires de Varennes, li sires de Longueval, li sires de Mailly, mesire Jehan de Mailly, li sires de Soyecourt, li sires de Raintbertpré, mesire Wistaces Dencre, li sires de Miromont, faites et données l'an mil CCC et quatorze lendemain du jour de Saint Andrien Lapostle.

*
 

Retour
Retour

Accueil
Suite