Histoire de Montdidier
Livre I - Pièce justificative 23
par Victor de Beauvillé

 

Philippe par la grace de Dieu roys de France a nos ames et feaulx conseillers larcevesque de Rains et levesque de Beauves ou a leurs vicaires et a tous les prelas abbes doyens et chappitres de la province de Rains aus quelz ces lectrez venront salut et dileccion. Plusieurs prelas abbez religieux et plusieurs noblez et non noblez et gens des bonnes villez de la dicte province nous ont requis moult affectueusement que nous leur vousissions donner congie et liscence de eulz asembler avec vous et les autres pour certaines grossez besongnes touchans nous et eulz sur le fait de nos presentes guerres et pour ce que les choses et besongnes sont grosses et hastives et desirent brief et hastif conseil nous ont requis et fait requerre que nous vous vuellions faire savoir qu'il ont prins et accepte journée à Mondidier a de mardi procain en huit jours pour avoir avis et conseil sur les choses dessus dictes avec vous et avec les autres noblez et non noblez de la dicte province. Pour quoi nous vous requerons et prions et neantmainz mandons la requeste des dessus diz que vous et chacun de vous qui estes des pais de Vermendois et de Beauvoisis soies au dit jour et liu toutes excusations cessans pour avoir avis sur les dictes besongnes en telle maniere que par votre deffaut les dictes besognez ne preingnent aucun delay et sachies que sil en y a aucuns defaillans nous en serons très-mal contens et voulons que chascuns en droit soy qui requis en sera par vertu de ces présentes lettrez baillent lettrez au porteur de ces présentes du jour et heure qu'il aura esté requis et semons de estre à la dicte journée de la dicte responsse ou responssez que fait en aurez chascun en droit soy. Donné a Amiens le XV jour de septembre l'an de grâce mil trois cens quarante et sept soux notre scel du secret.

Par le Roy,

Verriere.

1347 bis.

Philippe par la grace de Dieu roys de France a tous les nobles de la province de Rains aulsquels ces lettres verront salut et dilection. Plusieurs prelas abbes religieux et plusieurs nobles et non nobles et gens des bonnes villes de la dicte province nous ont requis moult afectueuzement que nous leur voussissons donner congie et licence de euls assambler avec vous et les autres pour certaines grosses bezoignes touchans nous et euls sur le fait de nos présentes gueires et pour ce que les choses et bezoignes sont grosses et hastives et desirent brief et hastif conseil nous ont requis et fait requerre que nous vous veullons faire savoir qu'il ont prins et acepte journée a Montdidier a de mardi prochain en wit jours pour avoir conseil et avis sur les choses dessus dites avec vous et avec les autres nobles et non nobles de la dicte province. Pourquoy nous vous prions et requerons et nientmains mandons a le requeste des dessus dis que vous et chascun de vous a qui ces lettres seront presentées qui estes des pays de Vermendois et de Beauvesis soyes au dit jour et lieu toutes excusations cessans pour avoir avis sur les dites bezoignes en telle maniere que par votre deffaut les dites bezoignes ne pregnent aucun delay car sachies que s'il y en a aucuns deffaillans nous en serons tres mal contens et volons que chascun en droit soy qui requis seira par vertu de ces présentes lettres baille lettres au porteur de ces presentes du jour et lieu que ces lettres vous aurons este presentées et de la respence ou respences que faites en aures cascun en droit soy. Donné à Amiens le XVe jour de septembre l'an de grace mil CCCXLVII sous notre scel secret.

Par le Roy,

Verriere.

1347 ter.

De par l'abbé de Corbie.

Receveur de Vermendois nous vous envoions par cest message 111 lettres patentes du roy nostre seigneur si vous mandons que sans delay quelcunques vous faches porter et presenter c'est assavoir les unes ad prelas les autres aus nobles et les autres ad bonnes villes si comme par la teneur des dictes lettres vous verrez en y celles estre contenu si que vous ny ait deffaut duquel vous series reprins et pugny. Escript à Amiens XVII jour de septembre.