Histoire de Montdidier
Livre I - Pièce justificative 32
par Victor de Beauvillé

De la liasse des acquits rendu sur le 12e compte de Simon le Pescheur receveur des domaines de Peronne Montdidier et Roye pour l'an 1434 a esté extrait ce qui s'ensuit :

A tous ceux qui ces presentes lettres verront ou oieront les maire et eschevins de la ville de Montdidier salut ; sçachent tous ceux par le don et octroye que nous a faict nostre tres redouté seigneur Monseigneur le duc de Bourgogne de toutes ses rentes et revenues qui luy appartenoient, et qu'il pouvoit avoir et recevoir en la dite ville et chastellenie de Montdidier tant en domaine comme en aydes et autrement, pour demy an commençant au jours de Pasques dernierement passé et finissant au jour Sainct Remy ensuivant dernierement passé, nous par le consentement et accord de honorable homme et saige, Simon le Pescheur, receveur général des villes, prevostez et chastellenies de Peronne, Montdidier et Roye, les avons receues pour ledit demy an, tournez et convertis en le reparacion, deffence et refortification de la dicte ville par le maniere que les lettres du don ainsy à nous faict font mention, excepté que des fermes des prevostez et clergies et lettres de bailly dudit Montdidier, n'avons aucune chose receu pour ce que par le temps dudit demy an ont peu ou néant valu et que pour la dite petite valeur, ledit monseigneur a donné et quitté à Jacques Clugnet a dont prevost dudit Montdidier et a Jean Leclerc dit frontière, poursuivant d'armes de mondit tres redoute seigneur monseigneur le Duc, lors fermier des clergies de la prevosté et bailliage dudit Montdidier.