Blason santerre.baillet.org

Histoire de Montdidier
Livre I - Pièce justificative 37

par Victor de Beauvillé

Pièce justificative 37

Ratification par Louis XI du transport fait au comte d'Estampes par le duc de Bourgogne, des châtellenies de Péronne, Montdidier et Roye.

1465.

 

Loys par la grace de Dieu roy de France savoir faisons à tous presens et avenir que comme notre tres cher et ami cousin Jehan de Bourgongne nous ait fait exposer que notre très cher et tres ame oncle le duc de Bourgongne lui a cedé et transporté les conte Daucerre prevostez chastellenies terres et seigneurie de Peronne, Montdidier et Roye pour plusieurs et grans sommes de deniers en quoy il lui estoit tenu et autres causes es transportz sur ce faiz pour en joyr et user selon la forme et teneur desdits transports lequel nous a supplié et requis que iceulx transports nous plaise avoir agreables et iceulx louer et approuver. Nous inclinans à la requeste de notre dit cousin voulans en ce lui complaire tant en faveur de la proximité de lignaige en quoy il nous actient que a ce que mieulx et plus honnorablement il puisse entretenir son estat et nous servir a nos affaires avons lesdits transpors et chacuns d'iceulx agreables et iceulx louez ratifiiez et approuvez louons ratifions et approuvons de notre grâce especial plaine puissance et auctorité roial par ces présentes. Si donnons en mandement par ces mesmes présentes a nos amez et feaulx conseilliers les gens tenans et qui tiendront notre parlement les gens de noz comptes et trésoriers aux bailliz de Sens et d'Amiens et a tous noz autres justiciers ou a leurs lieux tenans et a chacun deulx si comme a lui appartiendra que de notre presente grace approbacion et ratiffication facent seuffrent et laissent notre dit cousin joyr et user paisiblement et a plain sans lui faire ne souffrir estre fait mis ou donné aucun empeschement au contraire. Lequel se fait mis ou donné estoit voulons estre mis a plaine délivrance et au premier estat et deu et afin que ce soit chose ferme et estable a tousjours nous avons fait mectre notre scel a ces presentes sauf en autres choses notre droit et l'autrui en toutes. Donné à Poissy le unziesme jour de septembre l'an de grace mil quatre cens soixante trois et de notre regne le tiers. Et erat sic supra plicam scriptum et signatum. Par le Roy en son conseil ouquel vous ladmirai et maistre Jehan Simon esties. Rolant. Visa, lecta publicata et registra Parisius in Parlamento duodecimo die marcii anno Domini millesimo quadringentesimo tercio. Cheveteau. Collactio facta est.

Collatio facta est.

Extractum a registris ordinacionum regiarum in curia Parlamenti registratorum.

Pichon.

*
 

Retour
Retour

Accueil
Suite